ამერიკის კინოთეატრებში გამოსული ქრისტიანული ფილმი “იმედის ხმა: პოსუმ ტროტის ამბავი” პირველივე კვირაში გაქირავების ტოპ-10-ში მოხვდა. რეალურ მოვლენებზე დაფუძნებულმა სურათმა გასულ უქმეებზე 3 მილიონ დოლარზე მეტი შემოსავალი მოიტანა, რითაც საერთო ჩამონათვალში მე-7 ადგილი დაიკავა.

ფილმი მოგვითხრობს ნამდვილ ამბავს აღმოსავლეთ ტეხასის, პატარა ეკლესიის წევრების შესახებ, სადაც 22-მა ოჯახმა 77 მზრუნველობამოკლებული ბავშვი იშვილა.

სტუდიის წარმომადგენლები იმედოვნებენ, რომ ფილმი კიდევ უფრო მეტ მაყურებელს მოიზიდავს და ხელს შეუწყობს საზოგადოების ცნობიერების ამაღლებას მინდობით აღზრდის სისტემაში მყოფი ბავშვების პრობლემების შესახებ.

“იმედის ხმა” გადაღებულია Angel Studios-ისა და DailyWire+-ის თანამშრომლობით, რომლებიც ცნობილნი არიან კონსერვატიული და ქრისტიანული ღირებულებების მქონე პროდუქციით.

“ვთვლით, რომ ფილმს აქვს ძალა, მოახდინოს ნამდვილი კულტურული გავლენა კრიზისში მყოფი ბავშვებისა და ოჯახებისთვის.” – აცხადებს The Daily Wire-ის თანადამფუძნებელი ჯერემი ბორინგი.

ფილმმა ასევე მიიღო იშვიათი A+ შეფასება CinemaScore-ისგან, რაც მაყურებლის მაღალ მოწონებაზე მიუთითებს.

ფილმის წარმატება მიუთითებს მაყურებელში რელიგიურ და სოციალურ თემებზე გადაღებული ხარისხიანი ფილმების მზარდ მოთხოვნაზე. ეს ტენდენცია ბოლო წლებში სულ უფრო თვალსაჩინო ხდება, რაც ჰოლივუდის მეინსტრიმული სტუდიებისთვის სერიოზულ კონკურენციას ქმნის.

ეს Angel Studios-ის მეორე დიდი წარმატებაა გასული წლის ბლოკბასტერის “თავისუფლების ხმის” შემდეგ.